کشکول باہر اٹھا کر پھینکنا ہے، پاکستان کو موجودہ بحران سے نکال کر دم لیا جائے گا، کوئی طاقت ہمیں ترقی سے نہیں روک سکتی، سیکورٹی اور معیشت چولی دامن کا ساتھ ہے، آرمی چیف

راولپنڈی(مانیٹرنگ ڈیسک )آرمی چیف جنرل عاصم منیر نے اس عزم کا اظہار کیا ہے کہ کشکول باہر اُٹھا کر پھینکنا ہے، پاکستان کو موجودہ بحران سے نکال کر دم لیا جائیگا، کوئی طاقت ہمیں ترقی سےنہیں روک سکتی، سیکورٹی اور معیشت چولی دامن کا ساتھ ہے، زرعی انقلاب آکر رہیگا، گرین انیشیٹوو یہ دائرہ کار پورے پاکستان میں پھیلایا جائیگا۔ ان خیالات کا اظہار انہوں خانیوال ماڈل ایگریکلچر فارم کی افتتاحی تقریب کے موقع خطاب کرتے ہوئے کیا۔ پاک فوج کے شعبہ تعلقات عامہ (آئی ایس پی آر) کے مطابق پاک فوج کے سپاہ سالار نے تقریب سے خطاب کے دوران کہا کہ پاک فوج کو اپنی قوم کی خدمت کرنے پر فخر ہے۔انہوں نے کہا کہ پاکستانی غیرت مند ، غیور اور باصلاحیت قوم ہے، تمام پاکستانیوں نے بھکاری کا کشکول باہر اُٹھاکر پھینکنا ہے، ہمیں دنیا کی کوئی طاقت ترقی کرنے سے نہیں روک سکتی، پاکستان میں زرعی انقلاب آکر رہے گا۔ آرمی چیف جنرل عاصم منیر نے کہا کہ ہم اس ماڈل فارم کی طرز کے جدید فارم بنائیں گے جس سے چھوٹے کسان کو فائدہ ہوگا اور گرین انیشیٹووکا یہ دائرہ کار پورے پاکستان میں پھیلایا جائیگا ریاست ماں کی طرح ہوتی ہے، عوام اور ریاست کا رشتہ محبت اور احترام کا ہے۔جنرل عاصم منیر نے کہا کہ سیکورٹی اور معیشت کا چولی دامن کا ساتھ ہے، سیکیورٹی کے بغیر معیشت اور معیشت کے بغیر سیکورٹی نا گزیر ہے۔