عالمی عدالت انصاف میں حال ہی میں جنوبی افریقا کی طرف سے اسرائیل کے خلاف غزہ میں نسل کشی کے الزامات کے درخواست کی سماعت ہوئی ہے۔غیرملکی میڈیا کے مطابق اس کیس کی سماعت کرنے والے 15 رکنی بینچ میں 3 عرب جج بھی شامل ہیں۔مراکش کے جسٹس محمد بنونہ، لبنان کے نواف سلام اور صومالیہ کے عبدالقوی احمد یوسف بینچ میں شامل ہیں۔
جسٹس محمد بنونہ 1943ء میں مراکش میں پیدا ہوئے اور 2006ء میں وہ پہلی بار بین الاقوامی عدالت انصاف کے رکن منتخب ہوئے۔وہ 2001ء سے 2006ء کے درمیان نیویارک میں اقوام متحدہ میں مراکش کے سفیر اور مستقل مندوب تھے۔
جسٹس نواف سلام 1953ء میں پیدا ہوئے اور انہوں نے 1992ء میں پیرس کے انسٹی ٹیوٹ آف پولیٹیکل سائنسز سے پولیٹیکل سائنس میں ڈاکٹریٹ کیا، ہارورڈ لاء اسکول سے قانون میں ماسٹرز کی ڈگری اور سوربون یونیورسٹی سے تاریخ میں ڈاکٹریٹ کی ڈگری حاصل کی۔جسٹس نواف سلام نے 2007ء سے 2017ء تک نیویارک میں لبنان کے سفیر اور اقوام متحدہ میں مستقل مندوب کے طور پر خدمات انجام دی ہیں۔
جج عبدالقوی احمد یوسف 1948ء میں شمال مشرقی قصبے بونتلاند میں پیدا ہوئے۔ انہوں نے 2009ء میں بین الاقوامی عدالت انصاف میں شمولیت اختیار کی اور 2018 سے 2021 تک عدالت کے صدر کے طور پر بھی خدمات انجام دیں۔واضح رہے کہ رواں ہفتے عالمی عدالت انصاف میں فلسطینیوں کے قتلِ عام پر اسرائیل کے خلاف جنوبی افریقا کی درخواست پر سماعت ہوئی تھی۔
