انٹرنیشنل اوورسیز کانفرنس

*پریس ریلیز* *07 فروری – لاہور* 
اوورسیز پاکستانیز کمیشن پنجاب کے زیر اہتمام ایک بین الاقوامی کانفرنس مقامی ہوٹل میں منعقد کی گئی، جس میں دنیا بھر سے آئے ہوئے تارکین وطن اور پنجاب کابینہ کے وزراء نے شرکت کی۔ وائس چیئرمین اوورسیز پاکستانیز کمیشن، بیرسٹر امجد ملک نے معزز مہمانوں کا خیرمقدم کیا اور مختلف ممالک سے آئے ہوئے اوورسیز پاکستانیوں کے ساتھ کھلی کچہری میں تجاویز پر تبادلہ خیال کیا۔شرکاء نے وزیرِاعظم پاکستان اور وزیرِاعلیٰ پنجاب کے اوورسیز پاکستانیوں کے لیے کیے گئے اصلاحاتی اقدامات کو سراہا۔ کمشنر اوورسیز پاکستانیز کمیشن پنجاب، مرزا نصیر عنایت نے 41 اضلاع میں قائم کی گئی خصوصی عدالتوں کے بارے میں تفصیلی بریفنگ دی۔ اس موقع پر تمام اوورسیز پاکستانیوں نے وزیرِاعلیٰ پنجاب، محترمہ مریم نواز شریف، کو تارکینِ وطن کے لیے عدالتوں کی تشکیل کا بل منظور کرانے پر مبارکباد پیش کی۔کانفرنس میں وکلاء، تاجر برادری، خواتین اور اوورسیز اقلیتی کمیونٹی کے نمائندوں نے خصوصی طور پر شرکت کی۔ وائس چیئرمین بیرسٹر امجد ملک نے متحدہ عرب امارات کی ٹیم اور عرفان طور کا شاندار انتظامات پر شکریہ ادا کیا۔کانفرنس کا باقاعدہ آغاز مسلم لیگ (ن) متحدہ عرب امارات کے سینئر نائب صدر، عرفان علی طور، کے افتتاحی کلمات سے ہوا۔کمشنر اوورسیز پاکستانیز کمیشن پنجاب، مرزا نصیر عنایت نے اپنے خطاب میں پنجاب او پی سی کے اغراض و مقاصد، نمایاں کارکردگی اور مجموعی اعداد و شمار پر روشنی ڈالی۔ انہوں نے اوورسیزپاکستانیوں کی جائیدادوں پر غیر قانونی قبضے کے خاتمے کے لیے متعارف کرائے گئے "پنجاب اسٹیبلشمنٹ آف اسپیشل کورٹس (اوورسیز پاکستانیوں کی جائیداد)" ایکٹ کے بارے میں تفصیلات فراہم کیں، جو گورنر پنجاب کی منظوری کے بعد باقاعدہ قانون بن چکا ہے۔تقریب سے سابق وفاقی وزیر اور مسلم لیگ (ن) کے سینئر رہنما، عابد شیر علی، اور صوبائی وزیر زکوة و عشر، راشد نصراللہ، نے بھی خطاب کیا۔ مزید برآں، مختلف ممالک سے آئے ہوئے مسلم لیگ (ن) کے صدور اور سینئر عہدیداران، بشمول غلام عباس بھٹی، چیف پیٹرن (UAE) شیخ سعید احمد، شمشاد خان تنولی، پرویز سندھو، فرزانہ کوثر، شہزاد انور بھٹی (اقلیتی ونگ)، حافظ میر شمس، اور دیگر معزز شخصیات نے بھی اظہارِ خیال کیا۔  اس موقع پر وزیرِاعلیٰ پنجاب کے معاون خصوصی، ذیشان ملک، نے بھی شرکت کی، جبکہ معروف دانشور اور تجزیہ نگار، افتخار احمد، نے اوورسیز پاکستانیوں کے ملکی ترقی میں کردار پر روشنی ڈالی۔وائس چیئرمین اوورسیز پاکستانیز کمیشن پنجاب، بیرسٹر امجد ملک، نے اپنے خطاب میں اوورسیز پاکستانیوں کی قومی تعمیر و ترقی میں نمایاں خدمات کو خراجِ تحسین پیش کیا۔تقریب کے اختتام پر سعودی عرب سے تعلق رکھنے والے مسلم لیگ (ن) کے سینئر رہنما، رانا طارق، کے نوجوان بیٹے کی ناگہانی وفات پر افسوس کا اظہار کیا گیا اور مرحوم کے ایصالِ ثواب کے لیے دعا کی گئی۔ اختتامی دعا معروف مذہبی اسکالر، خطیب داتا دربار، رمضان سیالوی نے کرائی۔